7 Propuestes del Decrecimientu

sábado, 21 de enero de 2012

La propuesta decrecentista nun escosa na demanda del amenorgamientu de los niveles de producción y de consumu nel Norte ricu. Supon la defensa, al empar, de principios y valores perestremaos de los qu’anguaño dominen la sociedá. Les propuestes que vienen darréu, con perpoques variaciones, son del autor Carlos Taibo asoleyaes nel so llibru 'El decrecimiento explicado con sencillez'.

 1. Primacía de la vida social frente a la lóxica frenética de la producción, el consumu y la competitividá. Ye difícil imaxinar qu’esa primacía tea afitada si primero nun fuimos quien a salir, dafechu, del capitalismu.

 2. Fuelgu creativu frente a les formes d’ociu, siempre arreyaes al dineru y el consumu, que se mos ofrecen per dayuri. Nesi sen, el decrecimientu supon una crítica radical de la mayoría de les formes asumíes pola industria cultural que mos acorvia en toes partes.

 3. Repartu del trabayu, una vieya y clásica demanda sindical qu’infelizmente perdió puxu col pasu del tiempu, como si’l “sálvese quien pueda” calistrare dafechu na práutica cotidiana de los sindicatos.

 4. Afitamientu d’una renta básica de ciudadanía -un ingresu mínimu que beneficie a toos- p’atender a los problemes innegables, que se revelarán al amparu d’un programa de decrecimientu. La de la renta básica ye, amás, una propuesta lóxica, en reconociendo’l derechu a esistir: ha de se garantizar esi derechu, reconociendo otros que-y dean sentíu plenu.

 5. Reducción del tamañu de munches de les infraestructures productives, alministratives y de tresporte. La globalización capitalista, na so dimensión de proyeutu claramente centralizador y mastodónticu, fexo posible un crecimientu irracional del tamañu de les infraestructures, sovencionaes con recursos públicos en provechu de los intereses y de los beneficios d’una minoría.

 6. Recuperación de munchos de los elementos de la vida llocal frente a, una vegada más, la lóxica de la globalización en cursu. Esa recuperación ha de fincar nuna demanda de descentralización y “descomplexización”, y ha de traducir nun renacer de la vida rural frente a les megalópolis forxaes nos decenios últimos. Ente les consecuencies d’esti procesu tarán; la reapaición de fórmules de democracia direuta (como’l conceyu abiertu) y l’autoxestión (la casería).

 7. Nel terrén individual, la sobriedá y la cenciellez voluntaries, dos elementos carauterísticos de la vida de munchos de los nuestros antecesores que fueron lliteralmente afaraos pol contrasentíu del capitalismu y de les sos regles. Nun ta de más incluyir nesti terrén la defensa de proyeutos que faen de la lentitú -la educación lenta, la comida lento- un aspeutu poderosu y saludablemente articulador de la vida social recuperada. “La velocidá ye la cara oculta de la riqueza” (Paul Virilio)

 Torna al asturianu por Vítor Suárez

No hay comentarios: