Artículu de Miguel Moro Vallina - El Local Cambalache
Como si d'una fatalidá se tratare, les crisis vienen a atayar, nos momentos más inesperaos, les esperances de crecedera ilimitada, d'aumentu sosteníu nos niveles de producción y de consumu. La de la década de 1930 dio al traste colos «felices venti», la de la década de los 70, colos «trenta años gloriosos» (1940-1970) de medría y polítiques del bientar n'Europa; na actual, de manera análoga, la emporfiada realidá punxo fin a la fiesta del lladriyu y la hipoteca y dexó n'evidencia la promesa, tantes vegaes repitida, de la economía inmaterial y de los servicios.
Sol inocente nome d'economía, la ideoloxía del nuesu tiempu evita'l términu más precisu de capitalismu, una organización social basada na producción de valor per aciu del trabayu humanu. El capital, actor toopoderosu nesti sistema de rellaciones sociales, merca y emplega la fuercia de trabayu nun procesu de producción de mercancíes del que la so finalidá ye la producción de beneficiu, de plusvalor. Esi plusvalor amonta la masa de capital nun procesu d'acumuladura carente de fin, qu'amenorga a les persones a una doble condición de portadores de fuercia de trabayu y consumidores de mercancíes.
¿A homes y muyeres per igual? Non. El capitalismu nun produz el patriarcáu, pero dota d'una nueva concreción a les rellaciones de poder ente homes y muyeres. Una concreción que tien enforma que ver col papel que, sol imperiu del trabayu asalariáu, desempeñen les muyeres como reproductores de la fuercia de trabayu. Esti ámbitu constitúi un elementu fundamental del analís materialista de les rellaciones ente capitalismu y patriarcáu (1).
El capitalismu, en virtú de la dinámica que la anima, tiende permanentemente a medrar, a la busca de nuevos mercaos, a la conquista de nueves árees sociales (materiales, cognitives, discursives, afeutives) que se ven subsumíes, imbuyíes na so lóxica. Pero'l procesu nun ta exentu d'estorbises y problemes, pos la naturaleza mesma de la mercancía, el dineru y el capital presenta un calter dual, contradictoriu.
Nes crisis, eses contradicciones españen violentamente y la realidá preséntase paradóxica: persones ensin trabayu y capital ociosu, falta de lliquidez na economía y «escesu d'aforru» nes families, necesidaes crecientes y mercancíes que nun llogren vendese…
La economía evita computar aquello qu'escapa a la so lóxica: les esternalidaes de la contaminación y la destrucción del territoriu apaecen como una resultancia banal de la crecedera inmobiliaria; los recursos fósiles valórense según el so costu d'estraición, anque la so formación riquió cientos de millones d'años; el trabayu de cuidaos, esencial pa la reproducción y el sostenimientu de la vida, sume subsumíu sol valor astractu de la fuercia de trabayu.
La continuidá de l'acumuladura rique de la constante producción de valor, de mercancíes. La propuesta del decrecimientu atenta contra esi preceutu fundamental, defendiendo l'amenorgamientu de necesidaes y deseos, l'aforru enerxético, la equidá social y la vuelta a circuitos curtios de producción y comercialización (2).
¿Qué ye'l decrecimientu? Ye'l cuestionamientu de les bondaes absolutes de la crecedera económica, la crítica de la equiparación ente consumu y felicidá, ente bientar, xusticia, medría y desenvolvimientu, la propuesta de vivir meyor con muncho menos (3). Nel so aportar hestóricu, el capitalismu tien marafundiao velozmente los recursos de la Tierra: los montes, los suelos, los acuíferos, los recursos fósiles. Con ello empecipiáronse cambeos na biosfera de calter irreversible, qu'amenacien la vida nel nuesu planeta talu como lu conocemos. Tolos estudios sobre la nuesa buelga ecolóxica amuesen que devasemos en demasía la capacidá de recuperación de la biosfera (4).
Les consecuencies negatives de la crecedera económica sobre la naturaleza, el ser humanu o les rellaciones Norte-Sur son más visibles que nunca. La propuesta del decrecimientu, a pesar de la so aparente novedá, vieno trescalando munches lluches anticapitalistes de los 200 años últimos.
La crítica del desenvolvimientu, del maquinismu, la ecoloxía política, la crítica a la urbanización desenfrenada del territoriu, la agroecoloxía y el consumu responsable y les reflexones sobre'l trabayu de cuidaos… Dende diverses perspeutives, toos estos movimientos defendieron l'amenorgamientu consciente de los niveles de producción, consumu y deséu de mercancíes. La lóxica del decrecimientu pon en xaque'l fundamentu mesmu de l'acumuladura; pero por ello mesmo, la retórica del poder trata d'apoderase del conceutu y desnaturalizalu, quitándo-y potencia revolucionaria.
Decrecer nun ye cosa d'amenorgar llixeramente la velocidá de la maquinaria destructiva del capitalismu. Ye, otra manera, un apueste por modificar radicalmente les rellaciones sociales imperantes, por poner en primer planu les necesidaes y cuidaos frente a los deseos de consumu, la reflexón sobre'l bien común frente al individualismu metodolóxicu. Decrecer rique repensar les rellaciones ente'l ser humanu y la Natura y, bien especialmente, ente homes y muyeres (5).
L'apueste del feminismu por descentrar los mercaos y poner nel centru del analís los procesos de sostenibilidá de la vida (A. Pérez Orozco) constitúi una invitación a cuestionar, dende una lóxica complementaria, l'imperiu del valor, del capital, del trabayu asalariáu. La propuesta de decrecimientu va ser anticapitalista y anti-patriarcal… o nun va ser.
1 Ver McDONOUGH, Roisin y HARRISON, Rachel (1978), «Patriarchy and Relations of Production», en Kuhn, Annette y Wolpe, Anne-Marie (eds.), Feminism and Materialism
2 Ente la bibliografía básica sobre'l decrecimientu ta'l llibru de Serge Latouche "La apuesta por el decrecimiento" (2008). Munches de les teoríes del decrecimientu funden los sos raigaños nos conceutos fundamentales de la Economía Ecolóxica; ente ellos, rescampla l'aportación d'Hermann E. Daly, Steady State Economics (1977).
3 La riqueza nun ye un estáu absolutu, sinón «una rellación ente les necesidaes y los bienes materiales. Ye posible ser ricu consumiendo muncho o deseando poco». SAHLINS, Marshall, Economía de la Edad de Piedra.
4 Esiste una documentación mui valiosa (parte d'ella en castellanu) sobre decrecimientu nos Proceedings of the First International Conference on Economic De-Growth for Ecological Sustainability and Social Equity, que pue descargase en http://www.degrowth.eu. En http://decrecimiento.info puen vese vídeos y audios de delles charres sobre la cuestión, ente les que destacamos les de Carlos Taibo y Amaia Pérez Orozco.
5 TUDELA TORRES, Marta, «Feminismo y decrecimiento: puntos en común, posibilidades de encuentro». Ca la dona, p. 64.
Artículu espublizáu orixinalmente na revista La Madeja nº 1
Tornáu por Vítor Suárez - Fueya en blanco
Entradas
